JE, JURGEN KLOPP ATASHANGILIA MAGOLI DHIDI YA DORTMUND LEO?

Kocha wa Liverpool Jurgen Klopp hajui kama atapokelewa na mashabiki wa Dortmud kama shujaa anaerudi vitani au Adui? Hata hivyo  kocha huyo hana lengo la kuwaridhisha mashabiki wake wazamani ambao walimpenda sana.

Klopp ametumikia klabu ya Dortmund kwa miaka saba akiwaletea mafanikio makubwa klabuni hapo ikiwemo kuifikisha  klabu hiyo katika level kubwa za kisoka barani Ulaya.

Kuondoka kwake mwezi mei kuliacha hisia kubwa za majonzi na shukrani kubwa kutoka kwa mashabiki wake, mashabiki ambao anaamini kurudi kwake leo katika uwanja wa Signal Iduna Park kutawakatisha tamaa katika mechi ya robo fainali ya Europa league.

“Sijui watu wanafikiria nini lakini ninachoweza kusema, tuliposema kwaheri ilikuwa vizuri, ilipendeza” alisema kocha huyo “Najua watu wengi watafurahi kuniona tena lakini sidhani kama huu ni muda nzuri wa kuonana na marafiki” aliongeza Jurgen Klopp.

“Nitashangilia kama Liverpool wakifunga goli, nilifanya hivyo nilipocheza na klabu yangu ya zamani ya Mainz ilipokutana na Dortmund na nimekaa Mainz kwa miaka 18, kama goli likipatikana dakika za mwanzo sitakimbia nikishangilia goli hilo lakini ni muhimu kufanya hivyo, sio kwamba napanga kufanya hivyo hapana lakini pia sitaenda pale nikiwa nimemeza vidonge vitakavyonizuia kushangilia” alieleza kocha huyo anaeitumika Liverpool kwa sasa.

Klopp anaiona Dortmund kuwa ni miongoni mwa klabu tano bora duniani, kikosi cha Dortmund kwa sasa kinaongozwa na wachezaji Pierre-Emerick Aubameyang, Marco Reus na Henrikh Mkhitaryan  katika safu ya ushambuliaji wakiwa tayari wameshafunga magoli 75 kwa pamoja,  wakati ukichukua idadi ya magoli ya wachezaji wote wa Liverpool haifikii idadi hiyo iliyofungwa na wachezaji watatu tu.

Mechi hiyo itapigwa katika dimba la Signal Iduna Park majira ya saa 4:05 usiku leo.

 Mechi zingine za robo fainali ya Europa leo ni Villarreal vs Sparta, Athletic Club vs Sevilla na Braga vs Shakhatar D zote zitachezwa muda mmoja  4:05 usiku.