KASEKE ACHEKELEA MAISHA YANGA

Kiungo wa Yanga, Deus Kaseke amesema anajiona ni mwenye bahati kwa kufanikiwa kuchukua mataji mawili (Ligi kuu Vodacom & Kombe la FA) pamoja na kucheza hatua ya makundi kombe la shirikisho Afrika CAF CC katika msimu wake wa kwanza tu kuichezea klabu hiyo.

Kaseke aliyejiunga na Yanga akitokea Mbeya City amesema licha ya kupata mafanikio hayo yote, kikubwa kinachomfurahisha ni kuwa miongoni mwa wachezaji waliopambana kupata mataji hayo.

"Mwanzoni wakati najiunga na Yanga sikutarajia kama ningekuwa sehemu ya wachezaji muhimu kwenye timu hii, kutokana na uwepo wa nyota wengi wa kimataifa, lakini pamoja na yote nilicheza kwa kujituma na kocha aliniamini na kunipa nafasi na kufanikiwa kutoa mchango katika mafanikio haya msimu huu." alisema Kaseke.

Aidha Kaseke amesema mafanikio hayo hayatamfanya abweteke  na kupunguza kasi ya kujituma bali ataendelea kupambana zaidi ili kuisaidia klabu yake huku akisema kuwa mipango yake katika soka ni kucheza soka la kulipwa katika ligi kubwa barani Afrika na Ulaya.
Kaseke alifunga goli la tatu katika mchezo wa fainali ya Kombe la FA dhidi ya Azam FC.

Bonyeza hapa ku-Like Page ya Soka24 Facebook