"Sisi Mashabiki Wa Yanga Timu Hatuielewi Kwa Sasa"

Mashabiki wa Yanga wameshindwa kuvumilia kinachoendelea kwa sasa katika timu yao hali iliyochangiwa pia na sare ya Juzi dhidi ya Al Ahly. Hali hiyo imepelekea Mashabiki hao kumfuata Kocha Charles Boniface Mkwasa anaeitumikia timu ya Taifa wakimwomba arejee kikosini kwa kile wanachodai mashabiki kuwa timu hiyo kwa sasa ni kama inapoteza muelekeo.

Mashabiki  hao walimzingira Mkwasa akijiandaa kuondoka uwanja wa taifa juzi katika pambano la Yanga. Licha ya Mkwasa kujitahidi kuwatuliza mashabiki hao lakini bado walikuwa wakipaza sauti zao zikizodhihirisha wazi kuwa wanamuhitaji mkwassa arudi nyumbani kwa maana ya Yanga huku wakiamini kabisa kuwa kurudi kwake Yanga kutaisaidia klabu hiyo kufanya vizuri zaidi tofauti na hali ilivyo kwa sasa.

“Sisi mashabiki wa Yanga, tunakuambia urejee kikosini, tunakuhitaji zaidi huku kuliko timu ya taifa.

Timu kwa sasa hatuielewi, haina stamina hata mabao mengi tuliyokuwa tukifunga kipindi ulipokuwepo hakuna tena, kwanza TFF kwenyewe hapaeleweki. Rudi nyumbani tu,” yalisikika maneno hayo kutoka kwa mmoja wa mashabiki waliokuwa wamemzingira Kocha huyo wa Timu ya Taifa.

Mkwasa aliondoka Yanga baada ya kupewa ofa ya kuifundisha timu ya Tanzania Taifa Stars.